Suomâ stuárráámus já muččâdumos kieldâ kesitábáhtusah

Aanaarohoi ulmen lii ive 2009 rääjist lamaš nuurrâđ oohtân kuávlu ärbivuáválijd kesitábáhtusâid já pyevtittiđ uđđâ kesiohjelm nuuvt páihálij ko mađhâšeijei illoon.

 

Aanaarohoin lii šoddâm suulân love peivid pištee tábáhtusráiđu syeinimáánu loopân. Ohjelmist láá kesitábáhtusah jyehiahasâš ulmuid – láá kylájuhleh, kollekištoh, párnáitábáhtusah, markkâneh, konserteh, kirkkotábáhtusah, pelimannitábáhtusah, taaiđâčáitálduvah, vandârdem, tanssâ, lávlum já teatter.

Tábáhtusâi jotteemeeri lii šoddâm täsivávt vuossâmui iivij vuálá 10 000 jottest ovdebij iivij suulân 11 000–13 000 jottei. Jyehi ive lii lamaš tyestilvuotâ keččâliđ uđđâ já lep pastam luoppâđ tábáhtusâin, moi kiäsutteijeevuotâ lii aalmug tâi talgoopargei tááhust kiäppánâm.

Oovtâstpargoost Aanaarohoid láá lamaš olášutmin Aanaar kieldâ sehe páiháliih seervih, irâttâsah já ovtâskâs ápáliih almaah já nisoneh. Ohtsâšmarkkânistem vievâst meid uccâ kylátábáhtusah, keččâlemluánduliih kulttuurtábáhtusah sehe algâttellee tâi uđđâ ovdedeijee irâtteijeeh peesih uáinusân.

Aanaarohoin lii šoddâm tehálâš uási oovdedmist páihálij aassâmmakkuuvuođâ sehe kuávlu tubdâm já kiäsutteijeevuođâ kesimađhâšemčuosâttâhhân.

 

Aanaarohoh tánssájeh, lávluh, čuojâtteh, kuálásteh, toideh já mainâsteleh.